PENIEL 17 APRIL 2011

 TUMKAU NI PSAML SUNDAY

‘Tin, mi tam takin kalkawngah chuan an puan an phah a; mi dangin lova mi chhawl satin an phah bawk a.Tin, a hma lama kalte leh a hnung lama rawn zuite chuan, “Hosanna!Lalpa hminga lo kal chu fakin awm rawh se,

Ram lo thleng tur, kan Pa Davida ram chu chawimawiin awm rawh se.

Chungnung berah khian Hosanna!” tiin an au va.’ Marka 11: 8 -10

Kan Lalpa Isua Krista khawvela a len lai khan he ni TUMKAU NI ah chiah hian Lal anga chawimawiin a awm a nih kha. Vawiin ni hi chumi ni champha chu a lo ni leh ta reng mai.

Jerusalem khawlai velah chuan mipui tamtak te chuan Lal Isua an chawimawi a, a kalna tur ah te hnimhnah te leh an mahni puan ngei te Lal Isua rah turin an lo phah a. Amah chawimawina thu au chhuah puiin nasa takin an aw rawl nen an taksa nen an inpumpek a nih kha. Amaherawh chu, chumi hnu kar khat pawh a la ral lo tih ah chuan Lal Isua an chawimawia kha hekin a lo awm ta a, a chungthu roreltu ten an rel ta a. Mipui te hnenah engtianga tih nge an duh tih zawhna chu heti hian chhan an ni ta.. ‘ Khengbet rawh....kross ah khengbet rawh..’ tiinmipui te chuan an duhthlanna thu chu nasa takin an au chhuahpui leh si a nih kha.

“ Chawimawina au thawm a reh ta..

‘Khengbet rawh’ tiin mipui an au.

Kross Pathian hnuchhawn ramah chuan,

A hnungzuitute khawnge an awm tak le” .

Ringtu ten kan Lalpa Isua Krista kan zuina kawngah hian thlarau thianghlimin kan thinlung leh ngaihtuahna te a luahkhah lai chuan a Biakbuk ah te hlim takin amah kan fak thin. Chawimawina au thawm nen kan hlimin kan lawm em em a, phur takin atan leh a rawngbawl na atan te thahnem ngai takin kan thawk tawrh tawrh thin a. Mitui tla zawih zawih chungin lawm avang te, tuarpui na avang te leh inchhirna avangte in amah kan fak thin a nih kha. Chutiang dinhmuna kan din lai chuan kan tuar a chhelin fak kan dawl hle thin, tlangrel leh sawichhiat te phur thin mah ila Krista avangin chhel takin kan tuarin kan hneh fo thin.

Mahse....Ni khua alo rei a,kum a lo vei a, chhandam hlimna par kan tlan te chu a lo chuai tan ta a.Thlemna thlipui a lo hrang a, theihtawp a kan fak na leh chawimawi ve thin na te chu kan aw rawl leh taksa mai chauh alo ni thin em niang? nge mite mit hmuh a mawi ah chauh te, nihna khelh nan chauh te em ni kan Lalpa hi kan lo fak thin le.. rawngbawlna atana kan inpekna te hi pawnlang chauh em niang le? Thinlung chhungril tak tak a amah chu faka, inpekna tak tak nena a rawng kan bawl thin lo anih chuan mitkhapkar lekah ‘ Khengbet rawh..’ tia au tute nen khan kan in ang reng mai lawng maw? Ngun takin han dawn chiang ve teh. Tunah hian eng dinhmunah nge i lo din ve le??