Mihringte hi Pathian in kan chunga ro a relnaah hian kan hmanhmawh fo thin a. Keimahni ham\hatna leh nawmsakna kan thlakhlelh luat avang hian Pathian hi tlai thinah kan ngai fo thin. Pathian hnathawh leh thiltihte kan nghah hman loh avangin keimahni duh danin chak takin kan kal a, kan dai phelh pheng phung reng a ni. Amaherawhchu Pathian hi a tlai ngai lova, a hun takah a ropuina leh thiltihtheihna a lanchhuah tir zawk thin. Amah beiseia A chunga rinna nghat thin tute hi a tithlawn ngai lo a ni. Huaisen taka Amah tantu leh Amaha rinna zawng zawng nghattute tana a rinawmzia chu Bible ah pawh tam tak kan hmu a chungzing chuan Daniela leh a thiante chungchangah pawh chiang takin kan hmu a ni.
Ringtu inti tamtakte hian Pathian hi kan ring zo lo fo thin a, Amah kan rin loh avang hian a hnathawh lo thlen hmain kan lo phatsan fo thin. A malsawmna kan dil a, a chhanna kan hmuh hmain hmanhmawh takin kan duh angin kan lo chet khalh a, nupui pasal te pawh kan dil a min pek hmain kan lo inru fo thin a nih hi. Hei hi kan rinna duap lutuk vang a ni thei em?
Amah ringtute chunga Pathian hnathawh kan hmuh hian Pathian tlai ngai lohzia kan hmu a, keimahni kan hmanhmawh lutuk avang hian a tlai thinah ah kan lo ruat mai mai thin zawk a lo ni. Hawh u Daniela leh a thiante ang hian Lalpa hnathawh lo thleng tur chu rinawm takin nghak thing ang u, ‘min chhanchhuak dawnlo mahsela milem chibai ka buk lovang’ ti ngam khawpa Amah ringtu leh beiseitu hi Pathian hian a ensan mai mai ngai lo. Tlai ngailo Pathian hian kan thatna turin kawng engkim min ruahman saka, kan dilna leh ngennate min chhang tur hian a tlai ngai love.
No comments:
Post a Comment