Thlarau nun a chauh thinna chhan hi kan ngaihtuah ngai em? Pathian thua tuihalna reng reng nei lova kan awmna chhan hi kan ngaihtuah ngai em le?
Mizo Kristian tam zawkte hian kan thlarau nun kan enkawl kawngah hian thatchhiatna lian tak mai kan nei a. Chu chu fianriala mahnia hunbi neia Pathian biak (Personal Devotional Life) hi a ni. Nautein a hriselna atana a nu hnute tui a mamawh ang bawk hi a ni.
Johana 15:4 ah chuan, ‘Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang’ tiin Isua’n min hrilh.
Lal Isuaa awm reng nun chu engtin nge kan neih ang? Chu chuan engtin nge rah a rawn chhuah ang, tih hi kan zirtur chu a ni ta a ni.
Lal Isuaa awm reng tur chuan, amah pawlna nun (devotional life) kan neih a ngai a. Rah chhuak tur chuan keimahniah amah a awm a ngai a ni.
Amah pawlna nun nei tur chuan engtin nge kan tih ang? Engtin nge amah chu keimahniah a awm ang?
Amah pawlna nun nei tur chuan kan tawngtai ang. Mumal taka tawngtaiin a hmaah kan kun tur a ni. Lawmthu sawina te, ngaihdam dilna te, tanpui dilna te leh dilna dang dangte chu felfai takin kan thliar tur a ni.
Amah chu keimahnia a awm theih nan, bible kan chhiar tur a ni. Chhiar liam puat tur a ni lo. Bible bu pum chhiar zawh hian min tanpui tam lo thei, mahse a zira kan zir tel chuan nasa takin kan thinlungah Pathian a inpuang anga, anin min chenchilh tlat ang. Chutah chuan keini ni lovin amah chu a rawn rah chhuak tawh zawk dawn a ni.
Tichuan ringtute, rawngbawltute, thlarau nuna ka chak lohna chhan chu hunbi neia bible chhiar leh tawngtaina kan neih loh avang te, thil zawng zawng kan tih hmaa (zing thawh hlimah) devotion kan neih loh vang te, thil zawng zawng kan tih hnuah (Kan mut dawnah) chauh a hming maia kan tawngtai avang te a ni. Mut dawn chauha tawngtai hi thuhriltu lar tak chuan, ‘Kan nunah Pathian no.1-a kan dah loh zia tilangtu a ni’ a ti.
Vawiin a hman hmaa Pathian hnena a thawhhlima thlarau chaw ei lo leh Pathian ralthuam famkima inthuam lova nilenga thlarau indonaa tualzawla tualchai ngam rawngbawltu engzat tak awm ang i maw?
Thlarau sualho nena indona puang ngam, hnehna puang thei si lova inti chau ngawih ngawih si rawngbawltu engzat tak awm ang maw?
Hengte avang hian tan kan lak theuhna tur chu, a huhova Pathian faka kan lam luih luih theih zawkna turin mahni theuha fianriala Pathian biak tam leh bible zir tam hi a ni.
Mal tlat nun neia Pathian nena kan indawr tam a nih phawt chuan mite hmuh loha a ruka kan neih chu a huhova kan awmkhawmnaah a rawn rah chhuak zawk ang a. Kan hrawkin a sawi nilovin kan nuna awm ina a sawi chu a ring zawk ang. Chu chuan mahni tan bakah midangte
tan rah duhawm tak a chhuah bawk dawn a ni.
No comments:
Post a Comment