DUHTHLANNA SANG BER - By Denis Lalfela sdb, Rome.

Kristian State ni a inchhal Zoram a zu leh drugs ngawlvei tamzia ngaihtuah la, duhthlanna dik siam a harsatzia i chhut thiam ngei ang. Zing thawh phat atangin duhthlanna siam tur kan nei. Kan nun pum nghawng thei duhthlanna chu fimkhur taka siam a tul thin. A leiba tam tak rulh nan putar pakhat hi a chenna in mawi tak hralh a, in chhe taka a insawn a tul ta a. A khawsak a nawm thin em avangin a thenawmte chuan an huphurhpui ngang aniang, “Ka pu, khi in chhia leh chep takah khian i hlim meuh ang maw?” tiin an zawt sek mai. Putar chuan, “Khi inah khian eng harsatna pawh tawk ila hlim taka nung turin duhthlanna ka siam fel ta” tiin a chhang mauh mai a, a tum tlat avangin a hlim chho ta. Sual hnathawh leh sual hneh tum a duhthlanna sang ber siamte nihlawhzia i thlir ho dawn teh ang.

Fimkhur loh vanga tlu erawh an tam. Zaithiam, speakers leh evangelists ropui takte hi engatinge inngaihna sual leh sual dangah an tluk thin le? Thlaraua thuamtu Isua zawi zawia an kalsan thin vang a ni. Pathian chauh kan engkima kan pawm theih nan, kan duhna piahlamah vuak leh tihtlawm fo kan ni. Kraws a hnehna puang ngamte erawh chuan tluknaah chakna an hmu a, tlawmnaah thiltihtheihna an hmu tlat thung. Hei hi thlarau finna, thlarau rah duhawm chu a ni. Anih leh sual lian dai lo inti si khan eng salah i tan le? Midang la kawk ngam tur i ni em? Sim tur kan nei theuh. Kan chaklohna erawh a in ang lova, a then sualna a langsar deuh a, an mualphopui mai a ni. Duhthlanna sang ber – Krista thlangtute chuan midang an kawk ngai lo. Mahni nun inenletin, thil dang zawng aia hlu, Krista nitinin an thlang thar thin. Harsatna leh thlemna kara chunglam tanpuina dilna chang hriate leh sual hneh tum tlatte hi kan Pathianin a ensan ngai lo. Kum 32 a niha piangthar Mt. Augustina chuan, “Aw Pathian, nangin i tan min siam tawh a. Kan thinlungte hi i hnena an chawlh hma loh zawng khawiah mah an hahchawl tawp lovang” tiin Lal Isua chu a lal leh Chhandamtu atan a puang hmiah mai.

Pathian ngaihdamna rinhlelh hi Setana chaw tui tak, piangthar inti tam takte eichhetu a ni. Pathianin a ngaihdam hmak tawh, tun hmaa an tihsualte inthiamlohna nena an ngaihtuah fo avangin chhungrilah an zalen lova, an nunah thlarauin hna a thawk hlei thei lo. Tidam thei hmangaihna aia tlenfai tawh suala an rilru dah lui tlatte chuan damna an chang thei hek lova, beiseina leh phurna thar nena hmalam an thlir reng loh chuan kehsawmna nasa zawk an hmabak a ni. Zalenna i thlan tlat loh chuan piangthar sal tang, Kristian tangkai lo leh thlarau hlimna neilo mihring i ni ang. Piantharna chu thlarauva inthuamtharna a ni. Krista thlangtute chu mahni ta an ni tawh lo. Man a lei an nih avangin nitin inlamletna nun an nung a, mahni ral lam panin an nunah Krista an dah lal tial tial thin. Mahni felna chapo pui te aiin mahni sualna hria a inchhirte hi Pathian hmaah an ropui zawk daih! Tin, thinlung taka inchhirte hi Thlarau Thianghlimin a kaihruai a, chakna thar leh hnehzelna nun a pe thin.

Nang, duhthlanna sang ber – Lal Isua chu i thlang ngam ve dawn em le?