KEIMA’N KA CHAWLHTIR ANG CHE U

Pathianin A fapa Isua khawvela a tirh chhan chu mihringin chawlhna dik a hmuh theih nan a ni. He chawlhna hi hahdamna, thlamuanna, zalenna tih nen thuhmun a ni. Khawvel sakhaw chi hrang hrang in an zawng a. Hmu/ nei/ dawng inti pawh an awm fo thin. Mahse, Pathian thu hian chu chawlhna chu hrilhfiah dan hran a nei a, a man fuhlo tan chuan hriatthiam pawh har tak a ni. He chawlhna thu hi ringtu leh ringlo tute ngaihven ber pawl a nih avangin Isua min zirtir dan Matthaia 11:28 – 30 atangin kan zirho dawn a ni.
I. Pakhatna ah chuan – Chawlhna chu tute tan nge? (Chang 28) Isuan “Nangni thawkrim leh phurrit phur zawng zawngte u …” an ti phawt a. Pathian in chawlhna a tiam hi thenkhatte tan chauh a ni lo va, mi zawng zawng tan a siam a ni. Mi zawng zawng tan a siam chu chang turin a hnenah kal a ngai, ‘Ka hnenah lo kal ula’ tiin a sawi chhunzawm kha. Isua hnena kal si lo va a hnena chawlh chu theih loh tihna a ni. Johana lehkha thawn pakhatna 1:6 ah chuan “Thima awm siin, “Amah ka pawl,” kan tih chuan dawt kan sawi a ni…” tih ziak a ni. Mi lungngai, thawkrim inti te min sawm a, Isua hnenah I kal ang u.

II. Pahnihna ah chuan – Thawhrim chu chawlhna nuam a ni- (vs.29a) Thawkrim leh phurrit phur te chawlhna tur Isuan a sawi a, kan inpekna chawlhsan zawngin min zirtir lo. Isua sawmna kan hmu phawt a. Tichuan a hnena kal dan a sawi chhunzawm leh ta a. A hnena kal tur chuan a nghawngkawl bah ve ngai a ni. Nghawngkawl bah hi inpek lantirna a ni. II Timothea 2:3 ah chuan Paula’n Timothea hnenah ‘Krista Isua sipai tha tak angin hrehawm mi tuarpui rawh’ a ti a. Awlsam taka Isua zui a zirtir lo a ni. Khawvel hian Isua zirtirna ang ve tak taka lo chher chhuak thin. Thawhrimna tellova hlawtlin a theih emaw kan ti. Mizoram Kristian state a inchhalnaah thilmak tak kan hre tan ta. Cheng sing chuang neih theih avanga vawi khat Hindu Pathian hmaa inthawiin Isua phatsan ngam kan awm ta. Isuaah lo hian kan chawlhna hi kan zawng tan mek a. Paula chuan, ‘Kraws thu chu boral mekte tan chuan atna’ tiin min lo hrilh tawh a. Pathian thu zawm inti si hian Kraws thutak ata hi I peng ve lo ang u.

III. Pathumna ah chuan – Mi chapo te’n chawlhna an hmu dawn lo (vs. 29) Tute nge thlarau tan chawlhna hmu thin? ‘Thuhnuairawlh leh rilrua inngaitlawm tak ka nih hi; tichuan in thlarau tan chawlhna in hmu ang’ a ti a. He chawlhna hi thuhnuairawlhna leh inngaihtlawmna a pek kan ni a. Miin thuhnuairawlhna leh inngaihtlawmna veka a pan loh chuan a dawng fuh dawn lo a ni. Kohhran zirtirna khamkhawp loh a awl thin. Zalen taka mahni duhdana Pathian thu kalpui hi rau deuha ngaih chang kan nei a. Isuan Petera hnenah “i naupan lai khan i taiah i inhreng a, I duhna apiangah i kal thin a; nimahsela i upat hunah i kutte i phar ang a, mi dangin an hrensak ang chia, i duh lohna lamah an kai ang che,” tia a fuihna hi ringtuten kan mamawh thar leh ta a ni.

Thufingte 11:2 chuan, ‘Chapona a lo awmin mualphovin a lo awm a, Inngaitlawmte hnenah chuan finna a awm’ a lo tih hi a dik a ni. Hmu fuh bik, tha ve tawk a inngaih a, rinna a lo kal hmasa te duhtawklohna alo pian chiah in chapona in min thunun ta tih I hria ang u. Chu chu a tlo lo va, chutiang mite chu mualphona, lungngaihna in alo hmuak thin. 

Isua hnenah chawlh I duh em? Isua tana tawhrim hi chawlhna nuam a ni. Kraws tello chawlhna chu khawvel zirtirna a ni a. Nuam in lang mahse, a tawp chu lungngaihna leh thihna a ni.

                                                                                                                    - Rev. BS Pachuau