Mi pakhat hian vawi khat chu mumang mak tak a nei a. A mumangah chuan vanramah lak chhoh a lo ni a. Vanram tuallai vela a vah a vah lai chuan Isua nen an intawng thut a. Isua chuan, 'Thiana, lo kal teh leia mihring te khu i thlir teh ang' a ti a.
Pathianni zing a ni a. Mi te chu Inkhawm turin Biak In lam an pan sup sup a. Van atang chuan an thlir reng a. Zai hruaitu in Piono a han hmet vel te chu a hmu reng a, mahse a ri engmah a hre thei lo a. Mi te chu an zai thup thup a, an ka âng te chu a hmu thei a, mahse an zai ri a hre thei bawk si lo a. Thuhriltuin thu a rawn sawi a, inkhawm te chu an ding a, an thu leh thin a, tawngtai turin an kâ an âng a, mahse chu pa chuan engmah a hre thei chuang lo.
Lungngawi lo tak chuan Isua hnenah, 'Enga tinge an aw leh zai ri reng reng kan hriat theih loh' a ti a. Isua chuan, 'thinlung leh tih takzeta tawngtai lo leh fakna hla sa lo chu he hmun atang hian a thawm kan hre phak thei ngai lo' tiin a chhang a.
Matthaia 15:8 ah chuan, "He miteho hian an kain mi chawimawi a, An thinlung erawh chuan mi hlat si a" a ti a.
Ezekiela 33:31 ah tihian a inziak , "Tin, a hlawp hlawpin i hnenah an lo kal ang a, ka mite ang maiin i hmaah an thu ang a, i thu an ngaithla ang a, mahse an zawm chuang lo vang: an kain hmangaihna nasa tak an tilang ang a, an thinlung erawh chuan hlepna lam a pan ang" a ti bawk.
Hemi a nih avang hian Johana 4:23 ah chuan ti hian a ti, "Chutichuan a hun a thleng dawn ta, tunah pawh a thleng tawh mek, chu mi hunah chuan Pathian chibai buktu taktakten thlarau leh tih tak zetin Pa chibai an buk ang, Pain chutiang mi chu a chibai buktu turin a zawng a ni" a ti a ni.
No comments:
Post a Comment